小冰生日會@2006-11-19

今日我的朋友仔幫我慶祝生日，實在非常開心!!
生日的照片可以按 這裏 或 shadow 看看。

我今日的行程
第一站: 青衣城
我約了candy & clock係青衣城食飯，佢地知道今日我係青衣開生日會，就想請我食飯同俾手信我，我又可以俾埋d相同video佢地。 佢地好好，去旅行都不忘買手信俾我，我就把它們當做生日禮物啦。多謝candy & clock~

見完他們後，時間尚早，還有個半鐘先夠鐘開生日會~我就獨個兒在青衣城閒逛，周圍試下衫睇下野，朋友知道我很早就自己到了，就特意找人/ 自己早點來到陪我走走，多謝哂lenlen,pangpang,龜龜呀~

第二站: 青衣長發邨麥當奴生日會
咁大個女第一次係麥當奴開生日會，阿堡打黎問我去麥當奴開生日會好唔好時，我覺得好搞笑，佢同阿粉覺得我一定鍾意，我就呢個意見提出左兩個要求，(1)一定要有精靈樹(2)一定要坐兒童座位，結果阿龜就話青衣長發邨有呢兩樣野，麥當奴生日會就咁開成啦!!

好多謝大家既光臨，有黎小冰生日會既有helen,pangpang, 阿龜, dordor, 堡堡, 阿粉, 振宇, ucfung, kenken，雖然阿燕同bonny臨時黎唔到，但你地都有打電話俾我，叫我玩得開心d~多謝哂呀!!

佢地黎到生日會，我都迫佢地一定要戴生日帽，真係好得意呀，大家都好聽我呢個主角既話，係咁易都戴過影過張相，之後仲一齊同公關姐姐玩遊戲，佢地都無搗亂。我地睇公關姐姐玩魔術，睇到嘆為觀止，雖然有d俾我地識穿左，但都好好睇呀~

阿龜負責買蛋糕同book場，佢預備左個小王子既汽球公仔俾我影相，同買左mickey mouse蛋糕俾我，非常開心，真係覺得自己好似小朋友咁幸福呀。切蛋糕後，Helen同pang買左禮物送俾我，係anna sui既化妝袋、眼線筆、金色眼影同mascara， 好鍾意呀，都唔知點回報好。之後再收到阿龜送既禮物，非常喜歡，非常感謝。

到最尾大家仲有禮物收呀，係麥當奴投球套裝，佢地個個好似大細佬咁係咁掟，7國咁亂，好彩係最尾先派禮物，如果唔係唔知點算好；而我亦預備左禮物俾咁多位有黎小冰生日會既朋友，係電話繩，女仔既就係花花蝴蝶電話繩，個個唔同色，而男仔就係織皮電話繩，每人都有自己既initial 扣係上面，之前為左問到佢地要咩initial，就扮野出post話有心理測驗，叫佢地揀代表自己既英文字，但佢地就揀埋d古古怪怪既字，結果要勁解釋先知道佢地會用咩字，仲要專登搵埋個心理測驗出黎應付佢地，真係暪得辛苦。

第三站：荃灣碌bowling
之前一直都無firm實生日會之後既活動，我很怕沒有下場，因為皮仔要下場先到。
好彩今日我話不如去碌bowling，阿粉就即刻話有一間係附近既場有得碌，唔貴只係比較舊，我地都無咩所謂，就去左個度碌bowling啦。我其實真係唔識碌，只係好耐無玩過，想去玩下，以前一直都只有廿幾分，今日有四十幾分，算係非常叻啦，雖然都係包尾，哈哈。

打完第一場之後，一班高手就再打第2場，我地一d唔太叻既人: 我、helen、doris、龜就退下火線轉去打NDS MK，都係呢個好玩D，至少我可以有得嬴下。雖然我打緊機，但我聽到佢地出面碌BOWLING好緊張，簡直係高手過招，成日都補中，最後好似係阿KEN以119分勝出。佢地不停叫囂、吵鬧，好開心，好鍾意聽到佢地咁吵，因為這代表他們玩得很投入很開心。

皮仔係打完第2場時出現，我幾驚佢會唔守約唔出現呀，佢黎到馬上同我講生日快樂，好開心呀~

第四站：荃灣打邊爐
我地打完Bowling就去打邊爐，一行人走在未去過既地方上，感覺好新鮮。

一邊食野一邊講住無聊野，係最愉悅既時刻，我地會講番以前一d大學時既趣事，去camp又遇到d咩，真係好快樂。但可能因為之前一晚整禮物仔整到5點幾既關係，個人覺得好攰，有點沒有反應，眼都有點呆了，但我不想離開，只因所有人都是因為我而來的，我想好好的感受這些快樂時刻。

食完走時都已經十點幾十一點了，大家在地鐵站分道揚鑣，真的很感激大家對我既寵愛。

大家都非常疼惜我，怕我今年無人陪我過生日，就著緊的為我預備生日，唔想我覺得寂寞，有你們這班朋友又點會寂寞，我非常慶幸呀。我時常對媽媽說，我的朋友們都好疼我架，她對我說，你唔好咁自大啦，人地禮貌上咁做咋，我對她說，不要質疑我既朋友，他們個個都真的待我如親人般好架!!!

後記：
今日我因為去麥當奴開生日會，所以特意束了孖辮扮可愛扮小朋友，朋友們可能都因為我生日的關係，沒有笑我低b。我對某人說，24歲了，以後都不可以扮可愛做小朋友了，那人說，無關係呀，你個人本身可愛就係可愛呀，唔關幾多歲事；我以前都因為個樣太小孩子而被迫扮大個，因為要遷就別人的喜好而裝大個，從來沒人對我說我可以可愛，第一次覺得有小孩子臉真好，謝謝。