麻煩哂~~

今日叫左我電腦既工程師阿龜黎幫我整部電腦，始終我唔等得，所有公司既文件同重要野都係哂入面，無左d資料，我根本就做唔到任何野，而且candy & clock既wedding已經迫近啦，我又咩都未做，只好再次麻煩阿龜幫我搞掂佢。

呢部電腦大大話話都煩左阿龜同ucfung幾十次，以前就因為自己一d stupid問題要阿龜同fung幫我走上走落搬部電腦去整，那時第一次出現的大問題係個windows無畫面，係個mon到load唔到野，其實係大概一年後，我已經發現原來最初只係我自己多手做左某d野先會令個mon無左畫面，而唔係部腦既問題，但當時我就再亂咁黎先會搞到變成係個腦既問題，咁多年後我都唔敢話俾佢地知，因為實在係太唔好意思啦.....我會發現到，係因為當阿龜幫我拎左部腦出去深水埗整之後，第一晚有得再用既時候，我再次犯了同一個錯誤，電腦再出現了同一個問題，我搵哂d電腦說明書同mon既說明書出黎睇，先發現原來我個mon係電腦著住時係唔可以用手熄左個mon架，咁樣佢係下次就會開唔到(搞錯!!)，要解決呢個方法好簡單，只要將插住mon個插頭拔掉，再插番，再開機就得啦(有無搞錯!!)，如果俾佢地知道左，佢地一定會講哂粗口架.....

講番今日部腦，阿龜幫我format左個c drive(原來我之前一直再裝windows時都無format過，只係不斷裝多幾個windows，唔怪之得c drive得咁少位，我真係唔識呢d野...)，然後想裝windows，但電腦一直係度話有d file copy唔到去個harddisk度，叫我地一係就retry，一係就skip左佢，一係就cancel setup，阿龜話咁代表個harddisk好有問題，即使裝到都應該會好快再壞........佢建議我買個新既harddisk，裝左window後再過番舊harddisk d野過去..

阿龜走左之後，我唔信邪，係都要裝個windows，不停按enter去retry copy file，結果係我硬頸底下，終於裝到啦，哈哈哈哈!!! (雖然幾天後問題再次出現....已經係後話了)

雖然阿龜無幫我成功開返電腦，但都非常唔該佢幫既大忙，專登放假都拎隻碟黎幫我整，佢幫我format左部腦都已經係幫我一大忙啦，我真係唔知format係咁樣既....麻煩哂!

今日電腦壞了

今日電腦壞了。

我一心以為電腦係因為牆上的插頭有小小漏電跡像先會成日無端自己reboot部機，見爸爸今天在家，就叫他幫我把它換了牆上的插頭。

他叫我把電腦先關掉了，然後再幫我整，我嫌麻煩，就直接把插頭拔掉，等佢就咁斷電，我諗住佢自己都成日斷電，應該都無咩分別既~

當爸爸把插頭整好，我再開機的時候，問題就來了，佢再入唔番windows，反而彈了藍色的畫面出黎，話有問題，佢唔會入電腦，叫我拆左某d硬件先，但根本無野裝左上去.....我知道，出現藍mon代表問題非常大了。

唉......我的電腦都已經有成4歲幾啦，個個人都說它年紀都非常大，而且都好慢了，係時候換過部新既，但，這是我的第一部自己俾錢既電腦呀，當年專登麻煩了阿龜幫我砌，它都陪左我咁耐啦，我唔想捨棄佢呀......(其實主要係唔想用錢買過部)

多謝久違了的說話

今天一位朋友對我說了一句我久違了的說話，這是從來沒有人對我說過的。

「你寫的，我喜歡看」
從來沒有人對我說過想看我的作品，我的劣作。
已經差不多3年沒有執筆了，我想我可能連字也忘了怎樣寫，他叫我寫下去，因為他喜歡看。

我說我不想寫是因為寫作令我變得負面，令我覺得自己很悲涼，怕走不回來。
他說只是因為悲傷較為賣座，才會這麼多人以此為主題，
「你不是要賣座，為什麼不可以為自己寫一些開心的詩呢?」
我對他說開心很難寫得好的，就把說話說完了。

但事實上，我是不懂得回應，我是要賣座嗎?不是，雖然以前真的曾用寫詩來為自己帶來外快，所以想別人喜愛，但所有作品，我都是為自己而寫的，我只想寫關於自己的事，那為什麼不寫開心的事呢?

這一記當頭棒喝讓我想了很久，可惜我是真的不再懂得執筆的質感了。
但我依然很感謝你對我說了這句想聽很久的說話。

工作後的休息

在完成了所有婚宴後，很開心可以到澳門走走抖抖氣，到一個唔屬於自己既地方，原來是真的會感到很relax的。

之前也曾到過澳門逛逛，但今次好像感到特別愉悅，到了一些未去過的地方，有了不一樣的經歷，到曾去過的地方，又有另一番的感受。原來以前看少了很多，亦嘗少了很多。今次到了大三巴,議事亭前地, 食雙皮奶, 夜遊竹灣, 萬聖節迷宮, 漁人碼頭, 葡京, 金沙, 食了豬扒多士, 大炮台等，可惜的是沒有去到觀光塔同食禮記雪糕磚，下次一定要再去。

這次住新世紀酒店，真的是很浮誇既酒店，房間非常寬敞，大得可以睡上7-8人以上同玩捉迷藏，仲靚過之前個客係香格里拉住那間。之前可能因為工作和其他原因既關係，就是不懂得放鬆，睡得一點也不好，每天只睡2,3小時就會想起床；到了澳門，忘記哂所有野，工作亦完了，最緊要係我連電話都關了，無人可以再找到我，人都放輕鬆了不少，我想這晚是我這段日子以來睡得最安穩的一晚。

感謝朋友抽時間陪我到了那裡玩耍，我真的玩得很開心。

Nicole & Brian Wedding

Nicole & Brian的婚宴又是一個很新鮮的體驗，他們二人很年輕時就已經到了澳洲讀書生活，今年他們決定步入一生的另一個階段，在澳洲註冊結婚及回港設宴招待親友。這是他們找我這位婚禮統籌的原因。

Nicole 是一個很高要求及知道自己要咩既新娘子，她沒有給予壓力，如果我俾她的唔鍾意，她就會自己再找另外一間。讓我感到很舒服。

當天其實很多事都尚算順利，只是一些兄弟姊妹給我帶來了不少麻煩，我不喜歡不聆聽的工作人員，這給我很多多餘的問題。幸好所有事都能順利完成。

今天給他們預備的遊戲我覺得是滿分的，只是沒有足夠時間去玩完它們，這不但有意思，而且可以全場一起投入，下次一定要再叫其他新人玩過。

這晚是我做mc的，唔知點解非常緊張，可能因為兄弟亂放花炮的意外，害我連台詞也忘了。幸好他們及賓客都沒有太大反應，下次真的要盡量避免叫兄弟幫手。

-------------------------------------------

10月的wedding就這樣完了，很多謝家姐及志棋既幫忙，還有coconut既協助，亦在此感謝這段期間不斷給我打氣的友人，我話過10月過後我就會重過正常健康生活，盡量不捱夜盡量不太早起盡量吃多一點盡量照顧自己，我會盡力的了。

這個月睡得真的很少，因為工作通頂了5-6晚，因為玩耍通頂了3-4晚，因為發吽哣晚睡了唔知幾多晚，真是瘋狂，要變了。

Vicky & Cham Wedding

今天是Vicky & Cham Wedding。
他們不是大型的婚宴，只是用最簡單的COCKTAIL 形式，請了最親的親人和朋友，邀請律師到場地進行証婚儀式，讓自己及家人可以用更輕鬆更近距離的方式去迎接這件快樂和感人的事。

他們沒有世俗既約束，沒有特定的儀式，所有事都隨心所慾，是一次很愉快的婚宴經驗。

Kelly & Keith Wedding

今天是Kelly & Keith 既wedding，佢地係一對很特別既新人。
keith非常愛kelly，而kelly就係一個受很多人寵愛既小公主。
打點他們這個wedding係一件很難的工作，我並不是說很多野做，而係佢地都有很高的要求，每件事都要完美，令我的壓力也倍增了不少。
這天其實很多事也不如意，很多事都亂了，害我心情也繃緊了不少。

不過對於可以成功令KELLY 有非常意外的SURPRISE，我是很開心的，當佢見到自己的花車公仔掛在一架紫色的古典ROLLS ROYCE上時，她呆了，她沒想到自己兒時的夢想---坐CLASSIC ROLLS ROYCE出嫁，可以成真，之前KEITH是不停對她說沒有BUDGET的，但卻叫我暗地裏替他安排，他真是一個很有心的新郎。


















到了晚上，KEITH更再次俾SURPRISE KELLY，暗地裏為她獻上情歌及想了很久的肺腑之言，所有人聽到都非常感動，只可惜KELLY都忍住唔喊，如果唔係一定更感人。


















當天新娘子KELLY非常漂亮，是我識佢咁耐最靚的一天。希望佢地將來都開開心心快快樂樂啦。

關於我的100事

1. 長頭髮，最愛長頭髮
2. 不服輸，永遠都不想輸給別人
3. 奶，只飲維他奶、鮮奶、子母奶，唔飲朱古力奶
4. 一姊一弟，常吵吵鬧鬧
5. 很怕熱，不愛穿有袖子的衣服
6. 單眼皮，對此非常自豪
7. 相機，出街必備三寶之一
8. NDS，出街必備三寶之二
9. 書，出街必備三寶之三
10. 常被說 " 你沒有朋友架"
11. 很易情緒抑鬱
12. 愛神秘
13. 很想去一次威尼斯同北極
14. 易胖，很想患厭食症
15. 愛睜大眼睛拍照
16. 認叻，咩都扮識
17. 扮清高，專學偏門野，哲學、水彩、寫詩
18. 17歲初戀
19. 最叻算數
20. Snoopy，最愛的人物
21. 返老還童，現在比小時侯更幼稚，更愛撒嬌
22. 儲物僻，空樽、鎖匙、垃圾、花紙、手巾仔
23. 在家時，非常霸道
24. 在外時，待人很好
25. 很串，陌生人的評價
26. 愛黃燈，不愛白燈
27. 想和叮噹做朋友
28. 有兩隻貓，肥貓同阿咩，兩隻都很愛
29. 自小被標籤為超級乖兒童
30. 裙子比褲子多出10倍
31. 喜歡別人叫我小冰
32. 介意別人怎看自己
33. 曾經有過筆名叫童零
34. 討厭別人懷疑我
35. 信奉一白遮三醜
36. 劉華係我既偶像
37. 喜歡妄想
38. 時常做惡夢
39. 愛上噴香水
40. 記憶力超強，即是記仇
41. 一生中，真正只恨過3個人
42. 很喜歡化妝
43. 側睡抱抱型，我的睡姿
44. 高跟鞋，必需品
45. 時常改變理想
46. 繡球花，我愛的花，從沒收過
47. 天使愛美麗，一生中最喜歡的電影
48. 貝隆夫人，一生中第二喜愛的電影
49. 喜愛80年代
50. 不喝黑/深色的飲品，咖啡/奶茶/朱古存/華田/好立克/麥精
51. 不喜歡幼的食物，幼面/米粉/粉絲
52. 不吃魚蛋,魚片,紅蘿白,魚,羊,瓜
53. 非常愛玩
54. 可以連續36小時只睡2-3小時
55. 可以連續4-5天不吃只喝水
56. 在2尺半床上同 1/3將床公仔和2隻貓睡覺
57. 愛拍照，拍人亦拍自己
58. 只有喜歡和不喜歡，無中間
59. 硬頸
60. 愛人就一定愛到底，不會吝惜
61. 孤寒精，全個家族公認的
62. 未試過住醫院
63. 最愛"娃娃看天下" ，鄭秀文的
64. 想有一張4尺大床自己訓哂
65. 有4部相機
66. 短短的寫作生涯中，只得過2次獎
67. 曾食素 5 年
68. 與人吵架，絕不認輸
69. 情緒不穩時，常會想找人抱抱，不理那個人是誰，抱抱令我有安全感
70. 喜愛沈溺
71. 無信仰，只信the book of answer
72. 喜愛自己做的台燈
73. 咩都愛動手做，燈,手飾,禮物,公仔,床單…
74. 檀香，很香很舒服
75. 愛小朋友，亦受小朋友歡迎
76. 常搶著做紳士才做的事
77. 對家人才發脾氣
78. 比以前多了朋友
79. 愛看玩具
80. 想學法文
81. 常佔人便宜
82. 喜歡乘無冷氣巴士兜風
83. 很多人喜歡的東西，我才不要
84. 只有右邊耳朵一個耳孔
85. 雙手總是體無完膚、傷痕纍纍
86. 常會執著於一些自己才信奉的信念，如手指上的皮一定只可扯/咬，不可剪
87. 很怕肥貓、阿咩會比我先走
88. 走得很急
89. 最多綠色的衣服
90. 最討厭別人說我胖
91. 相信緣份
92. 小時很醜，醜得別人指著我說"這個小孩怎麼咁醜樣?"
93. 愛到人多的地方
94. 我睡的地方都有一絲涼意…陰涼
95. 討厭戴眼鏡
96. 信自己多過信別人
97. 相信事實
98. 亂花錢是強項
99. 很愛家人
100. 很想愛自己

不能自己

呼吸很難很重
手也在不停的抖
可以靜下來嗎?

整了漂亮的花球,

今天幫一位客人整了一個花球，是為她度身而做的，佢給我照片，我跟著去買哂原裝既花材，整左一個一模一樣的花球給她。
她給我的用手機拍的照片:













我做好後用相機拍的照片:


她竟然同我講，"點解d色會唔同架，明明應該係一種淺粉紅呀~!"
根本就係手機影同相機影既分別，佢男朋友叫我用手機影一次俾佢睇，咁我就影啦。

我用手機影的:


佢睇完就話，"呢個係啦"

都唔明點解d人咁架，諗野都唔識轉彎，單向思維，如果佢唔係我個客，我真係會忍唔住話佢。
我自問對客好好，好多野佢地無要求我做，我都做左俾佢地，好似呢個客咁，佢話想買個絲花花球，但要成$398，我話我幫你搞左佢啦，慳d嘛，結果只用左一半錢，但佢卻奄奄尖尖，多謝都沒有。佢無俾錢叫我幫佢做一d相簿檯面同reception既佈置，但因為我想佢個wedding perfect，我自己幫佢搞埋，貼錢預備絲花簽名筆、3個玻璃蠟燭台、浮水花set、羽毛、珠鏈，樣樣都係錢，我都無同佢計啦，根本只係想佢好，但佢竟然對呢d我貼錢然後免費provide俾佢既野有要求，話咁樣唔好，可唔可以要咩咩咩，唉，真係好人難做，我唔識做一個生意人，我會蝕俾d客，當佢地係朋友，但佢地就當你係服務員，有咩都揸乾揸盡先，盡量要你俾多d野佢。

我真係太爛好人。

羨慕別人

今天我真的很羨慕別人，
羨慕別人比自己幸福。
想著自己已經很努力付出，
但總是沒有回報沒有收獲，
努力反而是帶來不幸的根源，
想著自己的可憐，
竟然流出了久違了的眼淚。

香格里拉酒店的婚禮

今天一位客人於港島香格里拉酒店結婚，很可惜忘記和她合照。
那裏的新娘房比我家還要大，仲有大水晶燈，飲品services，真的是5星級服務。
新娘子很漂亮，她很感激我為她做的所有野，仲俾左封好大既利是我tim!!

開不了心

昨天，一位小學同學打電話給我，說另一位同學想約食飯，我說好，我以為她們是想聚舊。
之後，她對我說，那位同學患了血癌。我馬上就說，那今晚見面啦。

當我見到這位朋友時，她是笑嘻嘻的對著我笑，她表現給我看她沒事。
在整餐飯裏，大家沒多少提及她的病情，只是輕輕的帶過。其餘時間她都笑著，說著往事，說著小時候的逸事，大笑，讓大家的感覺很舒服。但我，開不了心。

之後我們再去了喝酒，其間有很多無聊男子前來搭訕，妨礙我們談天，我們只好打發他們離開。最後另一位同學先回家了，只剩下我和患病的朋友，她喝多了，就告訴我其實她很擔心，擔心自己的兒子，擔心男朋友擔心自己，擔心媽媽為她哭，她覺得自己沒有將來，沒有路可以走，但她不敢向親人及男友訴說，只可在我面前哭。我擁著她，想給她力量，告訴她，妳是可以向我訴說的。

她是一個不幸的女孩，自少遭遇就很慘，結婚後又和丈夫離婚，家庭又有很大問題，可幸的是她現在有一個很疼她的男朋友，給她無限量的支持。

願她可以化險為夷，以後再和我喝酒談天。

ps. 多謝一位朋友專程的由老遠出來接我送我返家，辛苦了。