豬年年初一

希望所有朋友都開開心心，事業順利。

希望家人身體健康，萬事如意。

希望自己豬年可以順順利利，至少要快快樂樂。

大年初一，睡了幾小時，就起來向爸爸拜年，之後就到了公公家向公公拜年，見到姨媽姨丈及四舅父，但是就不見其他親人及同我同年今年將結婚的表哥，本想叫他預先俾定利是。

陪公公打麻雀，我不懂得打既一番起糊，結果新一年就送錢俾公公，都係想佢開心，小小錢就沒所謂了，妨且叫左爸爸代俾，不是出自我袋。

之後再到嫲嫲家拜年，又是廿幾三十人擠在家，不停的對他們講恭喜說話，大家族，講到口都攰了。成屋都是小朋友，我是最大的小朋友，所有在場的孫兒數我最大，最小的細我20年，我對他(小鈿鈿)說，你係我細佬仔，要叫我家姐，佢就開始向我辯駁話"你咁大個，我咁細個，又唔係同一間屋住，點會係你細佬呀？"，結果我費了很多唇亡齒舌才講得明白。

之後同佢講野，有一番好開心的對話:

小鈿鈿：大頭姐姐，點解小桃同yoyo食咁多野架？我食幾少~(小桃同yoyo係大佢小小既表姐)

大頭姐姐(我)：因為佢地大個你，個stomach大d(真係講英文先明)，咪要食多d野咯，我又大過你地，個stomach又再大d，所以又會食多d咯。

小鈿鈿：咁..咁大頭姐姐你幾多歲呀？

大頭姐姐(我)：我大你20年，你計下即係幾多呀

小鈿鈿：我..我..我識計，(數手指)20,21,22,23,24.....你24歲咯

大頭姐姐(我)：係啦，無錯

小鈿鈿：咁我21年後咪會大食過你咯~(懶醒樣)

大頭姐姐(我)：點會呀，你21年後幾多歲呀？

小鈿鈿：我咪25歲咯，所以咪大食過你咯~

大頭姐姐(我)：唔會，我一定食得多野過你架，我都係大過你呀

小鈿鈿：唔係哩...(個樣好肯定)

大頭姐姐(我)：咁21年後我幾多歲呀？

小鈿鈿：你咪都係24歲咯~~(非常得戚)

小朋友真係令人開心同快樂，雖然當一大班(6,7個都係幾歲大)小朋友一齊大叫同喧鬧時我會叫佢地靜d，但佢地始終都係快樂的，同佢地一齊玩時，我都不知不覺忘記了煩惱同唔開心。

今天收到26封利是，不算太多，仲有好多未收到，新年真係好。

今年我仲帶住隻豬仔毛公仔手偶去拜年，小朋友同大人見到都好開心，成日搶去玩，它是我新年的好拍檔，不過第一日就留低左係嫲嫲度，明天拎番先得。